Ապրիլի 6-ին, ժամը 20։56-ին Արարատի մարզային օպերատիվ կառավարման կենտրոն ահազանգ է ստացվել, որ Մասիս-Նուբարաշեն ավտոճանապարհին մեքենա է այրվում: Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։ Հրդեհը մեկուսացվել է ժամը 21:09, մարվել՝ 21:22-ին։ Այրվել է «BMW» մակնիշի ավտոմեքենա։

Ապրիլի 6-ին, ժամը 20։02-ին ՆԳՆ 112 օպերատիվ կառավարման կենտրոն ահազանգ է ստացվել, որ քաղաքացին փորձում է ինքնասպանություն գործել՝ նետվելով Առնո Բաբաջանյան և Շիրակի փողոցները կապող կամրջից։ Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։ Փրկարարները և ոստիկանները կանխել են քաղաքացու ինքնասպանության փորձը՝ վերջինիս տեղափոխելով անվտանգ վայր։

Ապրիլի 6-ին, ժամը 19։11-ին ՆԳՆ 112 օպերատիվ կառավարման կենտրոն ահազանգ է ստացվել, որ Արմավիրի մարզի Թաիրով բնակավայրում այրվում է ավտոտնակ։ Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երկու մարտական հաշվարկ։ Պարզվել է, որ Թաիրով բնակավայրի Օրբելի փողոցում գտնվող ավտոտնակում այրվում է «VAZ» մակնիշի ավտոմեքենա։ Հրդեհը մեկուսացվել է ժամը 19։34-ին, մարվել՝ 19։50-ին։ Այրվել են ավտոմեքենան և ավտոպահեստամասեր՝ մասամբ։

Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են: Փակ են Արագածոտնի մարզում «Ամբերդ» բարձր լեռնային օդերևութաբանական կայանից Ամբերդ ամրոց և Քարի լիճ տանող ավտոճանապարհները։ Վարորդներին հորդորում ենք երթևեկել բացառապես ձմեռային անվադողերով։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

ՆԳՆ փրկարար ծառայության տնօրեն–ՆԳ նախարարի տեղակալ Արամ Ղազարյանը Փրկարար ծառայության հատուկ նշանակության փրկարարական աշխատանքների իրականացման կենտրոնում ծանոթացել է ստորաբաժանման նյութատեխնիկական հագեցվածությանը և ծառայողների մասնագիտական կարողություններին։Արամ Ղազարյանը փրկարարական աշխատանքներում կարևորել է ժամանակակից սարքավորումներով ծառայության ապահովվածությունն ու անձնակազմի շարունակական վերապատրաստումները։Փրկարար ծառայության տնօրենը հետևել է կենտրոնի փրկարարների ցուցադրական վարժանքներին, որոնց ընթացքում ներկայացվել են պարանային և բարձրության վրա իրականացվող փրկարարական գործողություններ։ Հետախույզ-կինոլոգիական ջոկատի ծառայողները հատուկ վարժեցված շների մասնակցությամբ ցուցադրել են որոնողափրկարարական աշխատանքներ։ Ըստ սցենարի՝ շները հայտնաբերել են փլատակներում մնացած մարդկանց ու պայթուցիկ նյութեր։Արամ Ղազարյանը ծանոթացել է նաև նոր կինոլոգիական կենտրոնի կառուցման նախագծին։Այցի ավարտին անցկացվել է խորհրդակցություն, որի ընթացքում քննարկվել են ընթացիկ խնդիրներն ու առաջնահերթությունները։ Արամ Ղազարյանը բարձր գնահատելով անձնակազմի մասնագիտական հմտությունները՝ հանձնարարել է պահպանել ծառայողական կարգապահությունը և շարունակաբար բարձրացնել ծառայողների մասնագիտական պատրաստվածության մակարդակը՝ ապահովելով արտակարգ իրավիճակներին արագ ու արդյունավետ արձագանքելու կարողություն։

Հանրապետության տարածքում`Ապրիլի 6-ի և 7-ի ցերեկը, 8-11-ն առանձին շրջաններում ժամանակ առ ժամանակ սպասվում են տեղումներ. լեռնային գոտիներում՝ ձյան և թաց ձյան, նախալեռնային և հովտային գոտիներում՝ անձրևի տեսքով։ Ապրիլի 7-ի գիշերը սպասվում է առանց տեղումների եղանակ։ Քամին` հարավարևմտյան` 2-5 մ/վ, ապրիլի 8-10-ն առանձին շրջաններում սպասվում է քամու ուժգնացում՝ 15-18 մ/վ արագությամբ: Օդի ջերմաստիճանն ապրիլի 9-ի ցերեկը կնվազի 3-4 աստիճանով, Լոռիում և Տավուշում՝ 6-8 աստիճանով, ապրիլի 10-11-ի ցերեկային ժամերին ողջ հանրապետությունում աստիճանաբար կբարձրանա 4-6 աստիճանով։ Երևան քաղաքում`Ապրիլի 6-ի երեկոյան ժամերին հնարավոր է կարճատև անձրև։ Ապրիլի 7-ի ցերեկը, 8-10-ը ժամանակ առ ժամանակ, 11-ի գիշերը սպասվում է անձրև։ Ապրիլի 7-ի գիշերը, 11-ի ցերեկը սպասվում է առանց տեղումների եղանակ։ Ապրիլի 9-10-ը սապսվում է քամու ուժգնացում՝ 13-16 մ/վ արագությամբ։ Երևան քաղաքի ապրիլի 7-ի բազմամյա կլիմայական տվյալներ. Օդի առավելագույն ջերմաստիճան՝    27.3°C (1952թ.) Օդի նվազագույն ջերմաստիճան՝       -3.8°C (1981թ.) Օդի միջին օրական ջերմաստիճան՝    11.6°C ՀՀ ԳԵՏԵՐԻ, ԼՃԵՐԻ ԵՎ ՋՐԱՄԲԱՐՆԵՐԻ ՎԻՃԱԿԸ: ՏՎՅԱԼՆԵՐ ՍԵՎԱՆԱ ԼՃԻ ՎԵՐԱԲԵՐՅԱԼ.Հանրապետության գետերի մեծ մասում դիտվել է ջրի ելքերի նվազում, իսկ առանձին գետերում՝ որոշակի մեծացում։ ՇՄՆ «Հիդրոօդերևութաբանության և մոնիտորինգի կենտրոն» ՊՈԱԿ