Սեպտեմբերի 4-ին՝ փրկարարի մասնագիտական օրվա շրջանակում, հանրապետության տարածքում անցկացվել են միջոցառումներ՝ առավել տեղեկացված, պատրաստված և պաշտպանված հասարակություն ձևավորելու նպատակով։ Քաղաքացիներին ներկայացվել է տեղեկատվություն՝ աղետների սպառնալիքների, առաջացման պատճառների, արտակարգ իրավիճակներին արագ և արդյունավետ արձագանքելու մեխանիզմների վերաբերյալ՝ շեշտադրելով անհատական մակարդակում պատրաստվածության դերը՝ որպես աղետների և հետևանքների նվազեցման առաջնային գործիք։ ՄԱԿ-ի Փախստականների գործակալության (UNHCR) 2025–2026 թթ․ աղետների պատրաստվածության ծրագրի շրջանակում, Եվրոպական Միության և գործընկեր կազմակերպությունների աջակցությամբ, մշակվել և հանրությանը տրամադրվել են տեղեկատվական նյութեր՝ թռուցիկներ, բուկլետներ, ինչպես նաև տեղի է ունեցել «Հայաստանին սպառնացող աղետների վերաբերյալ վարքականոնների ուղեցույց» ձեռնարկի շնորհանդեսը, որում ներկայացված են մեր երկրի տարածքում առավել հաճախ հանդիպող վտանգավոր բնական երևույթների ժամանակ վարքագծի կանոնները։ ԵՄ աջակցությամբ վերատպագրվել է «Երբ արտակարգ իրավիճակ է» գործնական ուղեցույցը, որը հնարավորություն է տալիս արագ կողմնորոշվել արտակարգ իրավիճակների պայմաններում։Տեղեկատվական նյութերը տարածվել են հանրային վայրերում, ուսումնական հաստատություններում, համայնքային կենտրոններում և մարզերում՝ առանձնահատուկ ուշադրություն դարձնելով տարբեր տարիքային և խոցելի խմբերի։ Փրկարար ծառայության իրազեկման միջոցառումները նպաստել են քաղաքացիների տեղեկացվածության մակարդակի, ինչպես նաև համայնքների դիմակայունության բարձրացմանն ու անվտանգային մշակույթի ձևավորմանը։ Այսօրինակ միջոցառումները շարունակական են։

ՆԳՆ ՓԾ պատվիրակությունը Փրկարար ծառայության տնօրեն-ՆԳ նախարարի տեղակալ Կամո Ցուցուլյանի գլխավորությամբ սեպտեմբերի 17-ից 18-ը Տաջիկստանի Հանրապետությունում մասնակցել է բնական և տեխնածին բնույթի արտակարգ իրավիճակների հարցերով ԱՊՀ միջպետական խորհրդի 37-րդ նիստին: Սեպտեմբերի 17-ին նիստի մասնակիցներին Շախրինավայի փրկարարների վերապատրաստման ազգային կենտրոնում ներկայացվել են կենտրոնի՝ միջազգային չափորոշիչներին համապատասխան հնարավորությունները, ուսումնական տեղամասերը, դաշտային ավանը, տեխնիկական միջոցները, գույք-սարքավորումներն ու հրշեջ-փրկարարական տեխնիկան։  Սեպտեմբերի 18-ին տեղի ունեցած միջպետական խորհրդի նիստում ելույթ է ունեցել նաև ՓԾ տնօրեն Կամո Ցուցուլյանը։ Նա ՆԳ նախարարի անունից ողջունելով նիստի մասնակիցներին՝ ներկայացրել է ՆԳՆ-ում և, մասնավորապես, Փրկարար ծառայությունում իրականացվող բարեփոխումները, ինչպես նաև ՌՀՄԱԿ համագործակցության շրջանակում վերապատրաստումների և տեխնիկական հագեցվածության ուղղությամբ աշխատանքները։ Կամո Ցուցուլյանը հավաստիացրել է, որ ՆԳՆ Փրկարար ծառայությունը պատրաստակամ է առավելագույն ջանքեր գործադրել ԱՊՀ մասնակից պետությունների հետ համագործակցությունն ամրապնդելու և զարգացնելու ուղղությամբ՝ հանուն մարդասիրական գաղափարների և բնակչության անվտանգության։  Նիստի ավարտին ամփոփվել են հաշվետու ժամանակահատվածում կատարված աշխատանքները, ինչպես նաև ստորագրվել ԱՊՀ-ում արտակարգ իրավիճակների ոլորտին վերաբերող մի շարք միջպետական համաձայնագրեր։

Սեպտեմբերի 8-ից 11-ը ՆԳՆ փրկարար ծառայության տնօրեն - ՆԳ նախարարի տեղակալ Կամո Ցուցուլյանի գլխավորած պատվիրակությունը որպես դիտորդ մասնակցել է Բուլղարիայի Սոֆիա և Մոնտանա քաղաքներում ՆԱՏՕ-ի և Բուլղարիայի Հանրապետության համատեղ կազմակերպած դաշտային վարժանքին։  Վարժանքի նպատակներն էին` արտակարգ իրավիճակները և անվտանգային մարտահրավերները կառավարելու ՆԱՏՕ-ի դաշնակիցների և գործընկեր պետությունների կարողությունների ուժեղացումը, մասնակից պետությունների ու կազմակերպությունների լավագույն փորձի փոխանակումն ու համագործակցության խթանումը։  Վարժանքին մասնակցում էր մոտ 1200 մասնակից։ Կամո Ցուցուլյանը մասնակցել է տեղեկատվական սպառնալիքներին և ճգնաժամերի կառավարմանը վերաբերող պանելային քննարկումների։ ՆԳՆ ներկայացուցիչները հետևել են նաև նորարարական տեխնոլոգիաների ու համակարգերի գործնական ցուցադրություններին, որի ընթացքում ճգնաժամերի և արտակարգ իրավիճակների կառավարման գործում կիրառվել է արհեստական բանականությունը։

Հուլիսի 3-ին Փրկարար ծառայության տնօրեն-ներքին գործերի նախարարի տեղակալ Կամո Ցուցուլյանն ու «Հարավկովկասյան երկաթուղի» ընկերության գլխավոր տնօրեն Ալեքսեյ Մելնիկովը ստորագրել են փոխգործակցության հուշագիր՝ երկաթուղային ենթակառուցվածքներում վտանգավոր բեռներով վթարային իրավիճակների հետևանքների վերացման բնագավառում։ Փրկարար ծառայության տնօրենն, անդրադառնալով ոլորտային համագործակցության խորացման և համատեղ ծրագրերի արդյունավետ իրագործման նշանակությանը, ընդգծել է, որ փոխըմբռնման հուշագրի ստորագրումը հետապնդում է մարդասիրական նպատակներ։ Ալեքսեյ Մելնիկովը նշել է, որ «Հարավկովկասյան երկաթուղի» ընկերության համար Փրկարար ծառայության հետ համագործակցությունը առաջնահերթ ուղղություն է։

Հունիսի 17-ին ՆԳ նախարարության փրկարար ծառայության տնօրեն-ՆԳ նախարարի տեղակալ Կամո Ցուցուլյանն ընդունել է Հայաստանում Լյուքսեմբուրգի Մեծ Դքսության արտակարգ և լիազոր դեսպան Ալեն դը Մյույզերին և պատվավոր հյուպատոս Սուրեն Զոհրաբյանին։ Ողջունելով դեսպանին՝ Կամո Ցուցուլյանը շնորհակալություն է հայտնել այցի համար և ընդգծել, որ աղետների ռիսկի կառավարման ոլորտում Հայաստանն ու Լյուքսեմբուրգն ունեն համագործակցության լայն հնարավորություններ։ Փրկարար ծառայության տնօրենը ներկայացրել է բնակչության և քաղաքացիական պաշտպանության բնագավառում իրականացվող գործընթացները, ճգնաժամային կառավարման և ճգնաժամային հաղորդակարգերի զարգացման հեռանկարները։ Ալեն դը Մյույզերը, շնորհակալություն հայտնելով ջերմ ընդունելության համար, բարձր է գնահատել ՆԳ նախարարության կողմից իրականացվող ծրագրերն ու նախաձեռնությունները։ Դեսպանն ընդգծել է Լյուքսեմբուրգի պատրաստակամությունը՝ խորացնելու գործընկերությունը Հայաստանի հետ՝ արտակարգ իրավիճակների կանխարգելման և բնակչության պաշտպանության ոլորտներում։ Ալեն դը Մյույզերն իրատեսական է համարել երկկողմ համագործակցության զարգացումը՝ հատկապես աղետների ռիսկի նվազեցման, ճգնաժամային կառավարման կարողությունների ամրապնդման, ինչպես նաև փորձի փոխանակման, պատրաստվածության մակարդակի բարձրացման և դիմակայունության զարգացման ուղղություններով։ Կողմերը վերահաստատել են համագործակցությունը շարունակական դարձնելու պատրաստակամությունը: Հանդիպման ընթացքում քննարկվել են նաև փոխադարձ հետաքրքրություն ներկայացնող մի շարք այլ հարցեր։

Հունիսի 5-ին ՆԳ նախարարության փրկարար ծառայության և Հայաստանում Միավորված Ազգերի Կազմակերպության Փախստականների հարցերով գերագույն հանձնակատարի գրասենյակի միջև ստորագրվել է փոխըմբռնման հուշագիր: Հուշագիրը ստորագրել են ՆԳՆ փրկարար ծառայության տնօրեն-նախարարի տեղակալ Կամո Ցուցուլյանը և Հայաստանում Փախստականների հարցերով գերագույն հանձնակատարի գրասենյակի ներկայացուցիչ Մոնիկա Սանդրին: Կամո Ցուցուլյանն ընդգծել է, որ հուշագրի ստորագրումը Փախստականների հարցերով գերագույն հանձնակատարի գրասենյակի հետ ակտիվ համագործակցության արդյունքներից մեկն է, և Փրկարար ծառայությունը պատրաստակամ է շարունակել համատեղ աշխատանքը`գնահատելով միջազգային փորձի փոխանակման կարևորությունը: Մոնիկա Սանդրին իր հերթին նշել է, որ այս հուշագիրը ևս մեկ կարևոր քայլ է ճգնաժամային իրավիճակներում Հայաստանի պատրաստվածությունն ու արձագանքման կարողությունները ամրապնդելու ուղղությամբ: Պայմանավորվածություն է ձեռք բերվել շարունակել համատեղ աշխատանքը` ի նպաստ մարդկանց պաշտպանության և ճգնաժամային իրավիճակներում արագ արձագանքման մեխանիզմների բարձրացման ուղղությամբ։

Յուրաքանչյուր գաղափար կարող է իրականություն դառնալ, երբ այն համախմբում է գործին հավատացողներին։ Մոտ երկու տարի առաջ Տնտեսական լրագրողների ակումբ ՀԿ-ն՝ աջակիցների և գաղափարակիցների հետ միասին, նախաձեռնել էր կամավորական հրշեջ-փրկարարական հենակետի ստեղծում Մեղրաձոր համայնքում։ Արդեն 2025 թվականի հունիսի 4-ին տեղի ունեցավ նոր՝ 13-րդ հենակետի բացման արարողությունը։Միջոցառմանը մասնակցում էին ՆԳՆ փրկարար ծառայության տնօրեն-ՆԳ նախարարի տեղակալ Կամո Ցուցուլյանը, Հայաստանում Ճապոնիայի արտակարգ և լիազոր դեսպան Աոկի Յուտական, մարզային և համայնքային իշխանությունների, միջազգային կազմակերպությունների ներկայացուցիչներ, հյուրեր: Խորհրդային տարիների անասնաբուժարանի կիսաքանդ շենքը վերածվել է բարեկարգ և ժամանակակից հրշեջ-փրկարարական հենակետի՝ Ճապոնիայի դեսպանատան՝ Մարդկային անվտանգության ծրագրի դրամաշնորհային աջակցության շնորհիվ։ Այստեղ հերթապահություն կկազմակերպեն Մեղրաձորի կամավոր հրշեջ-փրկարարները՝ աջակցելով ինչպես համայնքին, այնպես էլ շրջակա բնակավայրերի հրշեջ-փրկարարական խմբերին։ Հենակետի կառուցման գործում ակտիվ մասնակցություն է ունեցել նաև Ներքին գործերի նախարարության փրկարար ծառայությունը՝ համայնքին նվիրելով հրշեջ ավտոմեքենա, ինչպես նաև կազմակերպել են կամավորների վերապատրաստում և որակավորման քննություններ։Հենակետի գործարկմանը ներդրում են ունեցել Կոտայքի մարզպետարանը, Ծաղկաձոր համայնքը, ինչպես նաև Ավստրիական զարգացման գործակալությունը, Ավստրիական ու Հայկական Կարմիր խաչը: Կամո Ցուցուլյանը շնորհակալություն հայտնեց Ճապոնիայի կառավարությանը և Տնտեսական լրագրողների ակումբին՝ Մեղրաձորում նման կարևոր նախաձեռնություն իրականացնելու համար։ Նրա խոսքով՝ հենակետի ստեղծումը համահունչ է ՆԳՆ որդեգրած ռազմավարությանը, որի նպատակն է բարձրացնել համայնքների պատրաստվածությունը արտակարգ իրավիճակներում և կրճատել արձագանքման ժամանակը։ ՆԳ նախարարի տեղակալն ընդգծեց, որ նոր հենակետի բացումը ևս մեկ գործնական քայլ է Հայաստանում կամավորական մշակույթի զարգացման գործում։ Ելույթներ ունեցան նաև Հայաստանում Ճապոնիայի դեսպանը, Կոտայքի մարզպետը, Ծաղկաձոր համայնքի ղեկավարն ու այլոք։ Նշվեց, որ գործընթացի շարունակականությունը կնպաստի բնակչության պաշտպանության արդյունավետության բարձրացմանը։Միջոցառման ընթացքում Կամո Ցուցուլյանը կրծքանշաններ հանձնեց որակավորված կամավորներին:Տնտեսական լրագրողների ակումբի նախագահ Աննա Բաղդասարյանը հենակետի կառուցմանն աջակցած մի խումբ անձանց հանձնեց շնորհակալագրեր՝ ծրագրի հաջող իրականացման համար։ Փրկարարի որակավորմանն արժանացած կամավորները վարժանք կատարեցին`ցուցադրելով մասնագիտական կարողություններն ու հմտությունները արտակարգ իրավիճակներում: Ավարտին` ՆԳՆ փրկարար ծառայության տնօրեն-ՆԳ նախարարի տեղակալ Կամո Ցուցուլյանը պատասխանեց լրատվամիջոցների հարցերին:

ՀՀ ՆԳՆ փրկարար ծառայության աշխատակիցները Մոսկվայում մասնակցել են Միավորված ազգերի կազմակերպության INSARAG խմբի համակարգման և կառավարման համակարգերի (ICMS) կիրառմանն ուղղված միջազգային վերապատրաստման դասընթացին։  Դասընթացն անցկացվել է Ռուսաստանի Դաշնության Արտակարգ իրավիճակների նախարարության Պետական հակահրդեհային ծառայության ակադեմիայում, որին ներգրավված են եղել մասնակիցներ Հայաստանից, Իրանից, Բելառուսից, Ռուսաստանից, Չինաստանից, Հորդանանից, Մալայզիայից, ԱՄԷ-ից և Օմանից։  Հայաստանը միջազգային վերպատրաստման շրջանակներում ներկայացրել է նաև դասընթացավարի կարգավիճակով մասնագետ։ ՄԱԿ INSARAG միջազգային չափորոշիչներով վերապատրաստման նպատակն էր մասնակիցներին հմտացնել ICMS համակարգի կիրառման մեջ, որն արտակարգ իրավիճակների պայմաններում թույլ է տալիս տվյալների արագ փոխանցում դեպքի վայրից համակարգման կենտրոններ՝ խելախոսների և նմանատիպ սարքերի միջոցով։ Այս գործընթացը էապես նպաստում է միջազգային առաքելությունների ժամանակ թիմերի որոնողափրկարարական գործողությունների արդյունավետ համակարգմանը, արագ որոշումների կայացմանը և ռեսուրսների օպտիմալ բաշխմանը։ Անդրադարձ է եղել նաև ICMS-ի գործնական կիրառման առանձնահատկություններին, տեղեկատվական հոսքերի կառավարման մեթոդներին և INSARAG ՔՈՓ թիմերի համակարգման փորձին։ ICMS միջազգային վերապատրաստումը կարևոր ներդրում է հանդիսանում փրկարարական ստորաբաժանումների կարողությունների զարգացման, միջազգային համագործակցության խորացման և արտակարգ իրավիճակների ժամանակ արդյունավետ ու համակարգված արձագանքման ապահովման գործում։

2025 թվականին նշվում է միջազգային որոնողափրկարարական թիմերի INSARAG ստանդարտների հավաստագրման համակարգի 20-ամյակը: Այդ կապակցությամբ հունգարական ջոկատի նախաձեռնությամբ պատրաստվել է հուշամատյան, որտեղ անդրադարձ է կատարվել նաև հայկական քաղաքային որոնողափրկարարական թիմին։ Մասնավորապես ներկայացվել են Թուրքիայում երկրաշարժի աղետի գոտում հայ փրկարարների կողմից իրականացրած աշխատանքները, ձեռք բերած փորձն ու այլ թիմերի հետ աշխատելու կարևորությունը, ինչը մեծ մարտահրավեր և միևնույն ժամանակ ձեռքբերում էր թիմի համար: Նշենք, որ INSARAG-ի չափանիշներին համապատասխան որոնողափրկարարական աշխատանքներ իրականացնելու միջազգային նոր մեթոդաբանության համապատասխանությունը հաստատելու համար քաղաքային որոնողափրկարարական խմբերը վերաորակավորվում են հինգ տարին մեկ: Հայկական թիմի հերթական վերաորակավորումը կիրականացվի 2027 թվականին։ Հղումը՝ INSARAG 2005-2025

Մարտի 23-ից 29-ը Փրկարար ծառայության տնօրեն-ներքին գործերի նախարարի տեղակալ, փ/ծ գեներալ-մայոր Կամո Ցուցուլյանի գլխավորած պատվիրակությունը ԵՄ կողմից ֆինանսավորվող «Աջակցություն Հայաստանում իրավապահ մարմինների և անվտանգության ոլորտի բարեփոխումներին» ծրագրի շրջանակներում աշխատանքային այցով Ֆրանսիայում էր: Այցի նպատակն էր քաղաքացիական պաշտպանության և արտակարգ իրավիճակների կառավարման ոլորտում փորձի փոխանակումը և համագործակցության ընդլայնումը։ Պատվիրակությունը հանդիպումներ է ունեցել Ֆրանսիայի ՆԳՆ Քաղաքացիական պաշտպանության և ճգնաժամային կառավարման գլխավոր տնօրինության (DGSCGC) ներկայացուցիչների, ինչպես նաև տարբեր քաղաքներում գործող հրշեջ-փրկարարական և արտակարգ իրավիճակների կառավարման ստորաբաժանումների ղեկավարների հետ։ Հարավ-արևելյան գոտու միջգերատեսչական գլխավոր վարչակազմում կայացած հանդիպման ընթացքում քննարկվել են Ֆրանսիայում Քաղաքացիական պաշտպանության և արտակարգ իրավիճակների ծառայությունների ընդհանուր կազմակերպման սկզբունքներն ու առաքելությունները, ինչպես նաև Ֆրանսիայի ՆԳՆ կառուցվածքը։ ՆԳ նախարարի տեղակալը հանդիպել է նաև Ֆրանսիայի հրշեջների ազգային ֆեդերացիայի նախագահ, ավագ կամավոր հրշեջ, փոխգնդապետ Ժան-Պոլ Բոսլանդի, ինչպես նաև Անսի, Գրենոբլ և Վալանս քաղաքների վարչական հրշեջ-փրկարարական ծառայությունների ներկայացուցիչների հետ։ Հանդիպումների ընթացքում ուսումնասիրվել է կամավորական հրշեջ-փրկարարական ջոկատների փորձը, ինչպես նաև ներդրված ծառայությունների և անձնակազմի կառավարման մեխանիզմները՝ Հայաստանում կամավորական համակարգի զարգացման նպատակով։ Միաժամանակ, անդրադարձ է կատարվել ճգնաժամային կառավարման և հաղորդակցման մեխանիզմներին, սպառնացող աղետների ռիսկերին և դրանց արձագանքման միջոցառումներին, արտակարգ իրավիճակների կառավարման գործողությունների շղթային, հրշեջ-փրկարարական օպերատիվ կենտրոնների աշխատանքի կազմակերպմանը։ Պատվիրակությունը հանդիպումներ է ունեցել նաև Ֆրանսիայի հրշեջ սպաների ազգային ակադեմիայի (ENSOSP) ղեկավար կազմի հետ, ծանոթացել մոդուլային սրահներին, հրշեջ-փրկարարների և կամավորների վերապատրաստման գործընթացին։ Այցելել են նաև գերատեսչական և քաղաքային հրշեջ-փրկարարական ծառայության գլխավոր շտաբ, ինչպես նաև սիմուլյացիոն կենտրոններ, մասնագիտական ուսումնական հաստատություններ։ Մի շարք քննարկումներ տեղի են ունեցել ուսուցման նորարարական մեթոդների, ճգնաժամային կառավարման, INSARAG ՔՈՓ թիմերի և շինարարական ռիսկերի կառավարման վերապատրաստման գործընթացների վերաբերյալ։ Այցի ավարտին պատվիրակության անդամները եղել են ջրափրկարարական ջոկատում, տեղում ուսումնասիրել տեխնիկական հագեցվածությունը, հետևել ջրափրկարարական աշխատանքների կազմակերպման և անօդաչու թռչող սարքերով հետախուզական աշխատանքների իրականացման ընթացքին։ Փորձի փոխանակման շրջանակում նման միջոցառումները նպաստում են ոչ միայն երկու երկրների համապատասխան ծառայությունների միջև կապերի ամրապնդմանը, այլև՝ Հայաստանում արտակարգ իրավիճակների կառավարման համակարգի զարգացմանը, արդիականացմանը և միջազգային լավագույն փորձի կիրառմանը։

ՆԳ նախարարությունը կարևորում է միջազգային վերապատրաստման դասընթացներին կին ծառայողների ներգրավվածությունը՝ կատարելագործելու արտակարգ իրավիճակներում արձագանքելու նրանց կարողություններն ու մասնագիտական գիտելիքները։ Քիմիական զենքի արգելման կազմակերպության (OPCW) նախաձեռնությամբ 2024-2025 թթ․ իրականացված Օժանդակության և պաշտպանության կարողություններն ամրապնդող միջազգային վերապատրաստման դասընթացի նպատակը խաղարկային սցենարներով քիմիական, կենսաբանական, ճառագայթային և միջուկային վթարների ժամանակ հիմնական վարքագծային կանոնների ուսուցումն էր, որին մասնակցում էին 25 կին՝ աշխարհի հինգ մայրցամաքներից: Վերապատրաստման դասընթացի ամփոփիչ վարժանքը տեղի է ունեցել մարտ ամսին՝ Շվեյցարիայի Շպից քաղաքում: Վարժանքին մասնակցել է նաև Փրկարար ծառայության աշխատակից, փ/ծ փոխգնդապետ Մերի Առաքելյանը. նա շուրջ մեկուկես տարի Շվեյցարական բանակի կողմից վերապատրաստվել է որպես քիմիական զենքի պայթյունի դեպքում առաջին արձագանքող և ուսուցանող։ Դասընթացի մասնակիցներին ուսուցանվել են քիմիական անհատական պաշտպանության միջոցների կրման, չափիչ սարքերի կիրառման, ինքնապաշտպանական հակաթույների օգտագործման առանձնահատկությունները, նմուշառման ընթացակարգը: Նրանք նաև անցել են արտակարգ դեպք-պատահարների կառավարման հատուկ ուսուցում, արցունքաբեր գազի ազդեցության տակ իրականացրել են անհրաժեշտ գործողություններ, կատարել լաբորատոր վերլուծությունների համար նմուշների հավաքում և ամբողջական ախտահանում: Շվեյցարական բանակի պատասխանատվությամբ անցկացվել են նաև զորավարժություններ։ Դասընթացի հրամանատար Մարկոս Մյուլլերը ներկայացրել է Շվեյցարական բանակի առաջնորդության փորձառությունը, մասնակիցներին սովորեցրել ձեռք բերած փորձը հետագայում ինչպես տեղայնացնել իրենց տարածաշրջանում։ Հայաստանի ներկայացուցիչը ներգրավվել է տարբեր առաջնորդական դերերում, որոնք արժանացել են բարձր գնահատականի։ Նա վերապատրաստվել է որպես հրշեջ-փրկարարներին առաջին արձագանքողներ ուսուցանող։

2011թ. մարտի 11-ին Արևելյան Ճապոնիայում տեղի ունեցած ցունամիի 14-րդ տարելիցի կապակցությամբ Սպիտակ քաղաքում կազմակերպվել է հիշատակի միջոցառում։ Հանդիսավոր արարողության ընթացքում ծաղիկներ են խոնարհվել Ճապոնիայի ահեղ ցունամիի, ինչպես նաև Սպիտակի երկրաշարժի զոհերի հիշատակին նվիրված հուշակոթողներին։ Միջոցառմանը ներկա էին ՆԳՆ փրկարար ծառայության տնօրեն Կամո Ցուցուլյանը, տնօրենի տեղակալները, Լոռու մարզային փրկարարական վարչության ծառայողները, Հայաստանում Ճապոնիայի արտակարգ և լիազոր դեսպան պարոն Աոկի Յուտական, Ճապոնիայի միջազգային համագործակցության գործակալության (JICA) վրաստանյան գրասենյակի Հայաստանի պատվիրակ Սակոտադա Կոբուն, հայաստանյան ծրագրերի համակարգողը,  Լոռու մարզպետի տեղակալը և մարզի բարձրաստիճան պաշտոնյաներ, ինչպես նաև Ճապոնիայի դեսպանատան աշխատակիցներ ու Սպիտակ համայնքի բնակիչներ։ Ելույթներով հանդես են եկել ՀՀ-ում Ճապոնիայի արտակարգ և լիազոր դեսպանը, Սպիտակի հրշեջ-փրկարարական ջոկատի հրամանատար Արմեն Մատինյանը և Լոռու մարզպետի տեղակալը: Նրանք անդրադարձել են հայ-ճապոնական երկարամյա համագործակցության կարևորությանը՝  ընդգծելով, որ Ճապոնիան մշտապես Հայաստանի կողքին է աղետների ռիսկերի նվազեցման և արձագանքման ծրագրերում, ինչը վառ ապացույցն է երկու երկրների միջև երկարամյա բարեկամական և սերտ համագործակցության շարունակականության։ Ճապոնիայի դեսպանն իր ելույթում, ցավակցություն հայտնելով ցունամիի զոհերի ընտանիքներին և տուժածներին, շնորհակալություն է հայտնել ՀՀ կառավարությանը, ՀՀ ՆԳՆ փրկարար ծառայությանը, Սպիտակի բնակիչներին և հայ ժողովրդին՝ երկրաշարժից հետո ցուցաբերած աջակցության համար՝ ևս մեկ անգամ կարևորելով հայ-ճապոնական բարեկամական կապը։ Միջոցառմանը Ճապոնիայի արտաքին գործերի նախարարության անունից Ճապոնիայի դեսպան Աոկի Յուտական պատվոգիր է հանձնել Լոռու մարզային փրկարարական վարչության պետ, փ/ծ գնդապետ Սերոբ Գաբրիելյանին՝ ի նշան նրա գործունեության՝ ուղղված Ճապոնիայի և Հայաստանի միջև փոխըմբռնման խթանմանը։