Սեպտեմբերի 24-ից 26-ը Շիրակի մարզում անցկացվեց «Երկրաշարժի դեպքում որոնողափրկարարական աշխատանքների իրականացումը» թեմայով դաշտային վարժանք, որին մասնակցում էր Շիրակի քաղաքային որոնողափրկարարական (ՔՈՓ) թիմը:

Վարժանքն իրականացվել է ՄԱԿ-ի միջազգային որոնողափրկարարական խորհրդատվական խմբի (ԻՆՍԱՐԱԳ) պահանջներին համապատասխան՝ նպատակ ունենալով բարձրացնել միջազգային առաքելությունների համար նախատեսված քաղաքային որոնողափրկարարական թիմերի պատրաստվածության մակարդակը:

Դաշտային վարժանքը ղեկավարում էր ՓԾ Շիրակի ՄՓՎ պետի տեղակալ, փ/ծ փոխգնդապետ Արսեն Ադամյանը:

Մինչ վարժանքի մեկնարկը ՆԳՆ ՓԾ աշխատանքային խումբը՝ ՓԾ տնօրենի օգնական Արմեն Գևորգյանի գլխավորությամբ իրականացրեց նախապատրաստական աշխատանքներ՝ մասնակիցներին ուսումնավարժությանը նախապատրաստելու ուղղությամբ:

Ուսումնավարժությանն ընդգրկված էին Փրկարար ծառայության Շիրակի մարզային փրկարարական վարչության, Գյումրու թիվ 1 և թիվ 2 հրշեջ-փրկարարական ջոկատների ՔՈՓ թիմում ընդգրկված փրկարարական ծառայողները:

Դաշտային վարժանքն անցկացվեց Գյումրի և Ախուրյան համայնքներում: Վարժանքի ընթացքում մասնակիցները, ըստ աշխատանքային տեղամասերի, խաղարկեցին մի շարք միջանկյալներ՝ կատարելով գործնական միջոցառումներ:

Պայմանական աղետի գոտում փրկարարական խմբերի կողմից իրականացվեցին պարանային աշխատանքներ, հետախուզություն, իրավիճակի գնահատում, ամրակապման աշխատանքներ, որոնողափրկարարական աշխատանքներ, տեսակավորման կետի ծավալում, տուժածներին առաջին օգնության ցուցաբերում և տեղափոխում շտապօգնության մեքենա:

Ամփոփելով վարժանքի արդյունքները և մասնակիցների կողմից կատարված աշխատանքները նշվեցին ինչպես առավելությունները, այնպես էլ բացթողումները: Հանձնարարվեց իրականացնել պարապմունքներ, հաջորդ ուսումնավարժությանն առավել արհեստավարժ և գրագետ գործելու համար: