Փրկարարների մասնագիտական պատրաստվածության ու արագ արձագանքման կարողությունների շարունակական զարգացումը անվտանգության ապահովման առաջնային խնդիրներից է։ Այդ համատեքստում հետևողականորեն քայլեր են ձեռնարկվում փրկարարների մասնագիտական գիտելիքների և գործնական հմտությունների կատարելագործման ուղղությամբ։ 

ՆԳՆ Փրկարար ծառայության փրկարարական ուժերի վարչության կողմից Արմավիրի մարզում անցկացված դասընթացն ուղղված էր հրշեջ-փրկարարական ծառայության արդյունավետության բարձրացմանն ու անձնակազմի հմտությունների զարգացմանը։

Երկօրյա ուսումնական գործընթացին մասնակցել են Արմավիրի մարզային փրկարարական վարչության ենթակա հրշեջ-փրկարարական ջոկատները։

«Հրշեջ-մարտավարական տեսական և գործնական պարապմունքներ, հրդեհի վերլուծության իրականացում ու հատուկ տակտիկական ուսումնավարժությունների փաստաթղթերի կազմում» թեմայով դասընթացում ներառված էին հրշեջ-փրկարարական գործունեության առանցքային ուղղությունները՝ հրդեհների զարգացման օրինաչափությունների ուսումնասիրություն, արդի հրշեջ-մարտավարական տեխնիկայի և սարքավորումների կիրառման առանձնահատկություններ, տարբեր տիպի օբյեկտներում հրշեջ-փրկարարական աշխատանքների մեթոդաբանություն և այլն:

Դասընթացի մասնակիցները գործնական պարապմունքների ընթացքում կատարել են հրշեջ-տակտիկական գործողությունների մոդելավորման, թիմային համագործակցության, արագ որոշումներ կայացնելու հմտությունների զարգացման, ինչպես նաև հատուկ իրավիճակներում գործողությունների համակարգման վարժություններ:

Դասընթացի շրջանակում հատուկ ուշադրություն է դարձվել նաև հրդեհների վերլուծական հաշվետվությունների կազմման չափորոշիչներին, տակտիկական ուսումնավարժությունների նախագծերի մշակմանը, փրկարարական գործողությունների արձանագրման ստանդարտներին և փաստաթղթաշրջանառության արդիականացված մեթոդներին։

Մասնագիտական դասընթացների շարունակական կազմակերպումը նպաստում է արտակարգ իրավիճակներին արագ, համակարգված և արդյունավետ արձագանքելուն, ինչպես նաև բնակչության անվտանգության ապահովման բարձրացմանը։