Փրկարար ծառայության տնօրեն-ՆԳ նախարարի տեղակալ Կամո Ցուցուլյանի հանձնարարականի համաձայն՝ անտառներում և բուսածածկ տարածքներում հնարավոր հրդեհավտանգ իրավիճակների մշտադիտարկման, հրդեհների կանխարգելման, արագ արձագանքման, հրդեհների դեմ պայքարի, դրանց տարածման, ինչպես նաև դրանց հետևանքների վերացմանն ուղղված միջոցառումները շարունակվում են:

Հուլիսի 30-ի դրությամբ հանրապետության ողջ տարածքում իրազեկման գործընթացում ներգրավվել է 2502 փրկարարական ծառայող։

Փրկարար ծառայության ստորաբաժանումների ծառայողները մայրաքաղաքի և մարզերի 5574 օբյեկտներում, հանրային վայրերում և անտառամերձ տարածքներում բարձրախոսներով և անօդաչու թռչող սարքերի միջոցով իրականացրել են իրազեկում:

Մարդաշատ վայրերում հրդեհային անվտանգության կանոնների պահպանման վերաբերյալ փակցվել է 9088 պաստառ և տարածվել՝ 3289 թռուցիկ: 

Միևնույն ժամանակ, հանրային հանգստի գոտիներում և անտառամերձ տարածքներում հնարավոր հրդեհներին արագ արձագանքելու նպատակով նախանշված վայրերում 281 մարտական հաշվարկ իրականացրել է հերթապահություն՝ հիմնականում ամենագնաց տեխնիկայի ներգրավմամբ։

Փրկարարական ծառայողների և էկոպարեկների համատեղ ուժերով անտառածածկ և բուսածածկ տարածքներում իրականացվել է հրդեհային իրավիճակի մշտադիտարկում: 

Հարգելի՛ քաղաքացիներ, հորդորում ենք պահպանել հրդեհային անվտանգության կանոնները, լինել զգոն և ցուցաբերել պատասխանատվություն: Նույնիսկ ամենափոքր անուշադրությունը կարող է հանգեցնել մեծածավալ հրդեհների:

Հրդեհի վտանգ ներկայացնող ցանկացած իրավիճակի դեպքում անմիջապես զանգահարե՛ք 911 հեռախոսահամարին: