Սեպտեմբերի 25-ին ՆԳՆ Փրկարար ծառայության տնօրեն-ՆԳ նախարարի տեղակալ Կամո Ցուցուլյանն ընդունել է ՄԱԿ-ի մշտական համակարգողի գրասենյակի համակարգման և հաղորդակցման մասնագետ Դորիս Մուրոն Կլոֆենստեյնին: Հանդիպմանը մասնակցել են նաև ՆԳՆ ՓԾ տնօրենի տեղակալ Տիգրան Պետրոսյանը և ՄԱԿ-ի մշտական համակարգողի գրասենյակի համագործակցության և համակարգման պատասխանատու Արևիկ Անափիոսյանը։

Ողջունելով հյուրերին՝ Կամո Ցուցուլյանը բարձր գնահատեց բազմամյա սերտ համագործակցությունը, շնորհակալություն հայտնեց միջազգային գործընկերներին Փրկարար ծառայության անձնակազմի կարողությունների զարգացման, տեխնիկական աջակցության և արտակարգ իրավիճակներին արագ արձագանքման բնագավառում շարունակաբար ցուցաբերած օժանդակության համար:

Ներկայացնելով ընթացիկ ծրագրերը և համագործակցության նոր հնարավոր ուղղությունները՝ Կամո Ցուցուլյանը կարևորեց ՄԱԿ-ի խորհրդատվական խմբի՝ ԻՆՍԱՐԱԳ-ի (INSARAG) միջազգային չափանիշներով որակավորված ՀՀ քաղաքային որոնողափրկարարական թիմի գործունեությունը և շեշտեց, որ 2027 թվականին միջազգային որակավորման քննությունները հաջողությամբ հաղթահարելու համար անհրաժեշտ է նորովի շարունակել ոլորտային մասնագիտական խորհրդատվական աջակցության տրամադրումը:

Դորիս Կլոֆենստեյնը, իր հերթին, շնորհակալություն հայտնեց ջերմ ընդունելության համար և ընդգծեց, որ ակնկալում է ակտիվ համագործակցություն արտակարգ իրավիճակների պլանի մշակման, վերջինիս շրջանակներում՝ աղետների կառավարման և արտակարգ իրավիճակների թիմերի ֆունկցիոնալության վերագնահատման ու վերահաստատման ոլորտներում: Նա նաև գոհունակություն հայտնեց Փրկարար ծառայության պատրաստակամության, օպերատիվ արձագանքման և թիմային աշխատանքի համար:

Հանդիպման ընթացքում քննարկվեցին նաև ճգնաժամային կառավարման, արտակարգ իրավիճակներին արձագանքման, տեղեկատվության կառավարման, վաղ ազդարարման, հանրային իրազեկման և ազդարարման համակարգերի գործարկման ու արագ արձագանքման կազմակերպման, համատեղ վարժանքների անցկացման հետ կապված մի շարք հարցեր: 

Կողմերը մտքեր փոխանակեցին տեխնիկական և փորձագիտական աջակցություն տրամադրելու վերաբերյալ և ընդգծեցին հետագա սերտ համագործակցության անհրաժեշտությունը՝ արտակարգ իրավիճակների կառավարման կարողությունների զարգացման ուղղությամբ։