Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են։ Կորեայի ձորի ճանապարհի հիմնանորոգման աշխատանքներով պայմանավորված, հաշվի առնելով քարաթափման վտանգը, օգոստոսի 19-ից ճանապարհը ժամանակավորապես փակ է երթևեկության համար։ Վարդենյաց լեռնանցքում և «Մեղրու սար» կոչվող հատվածում տեղում է ձյուն։ Թալինի, Արտաշատի տարածաշրջաններում և Դիլիջանի, Սպիտակի ոլորաններում մառախուղ է։ Վարորդներին հորդորում ենք երթևեկել բացառապես ձմեռային անվադողերով։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

Ըստ ՇՄՆ «Հիդրոօդերևութաբանության և մոնիտորինգի կենտրոն» ՊՈԱԿ-ի` Հարավ-արևմուտքից ակտիվ ցիկլոնի ներթափանցմամբ պայմանավորված՝ հանրապետության ողջ տարածքում դեկտեմբերի 7-ի ցերեկը և 8-ի գիշերը սպասվում են տեղումներ։ Շիրակում, Լոռիում, Արագածոտնի, Կոտայքի, Վայոց ձորի, Սյունիքի լեռնային շրջաններում և Սյունիքի նախալեռնային շրջաններում տեղումները կլինեն ձյան և ձնախառն անձրևի տեսքով, տեղ-տեղ՝ ինտենսիվ։ Արարատյան դաշտում, Արագածոտնի, Կոտայքի և Վայոց ձորի նախալեռնային շրջաններում, Տավուշի և Սյունիքի հովտային գոտիներում, այդ թվում նաև Երևանում սպասվում է անձրև։ Հանրապետության տարածքում` Դեկտեմբերի 7-ի ցերեկը, 8-ի գիշերը շրջանների զգալի մասում, 9-10-ը, 12-ին առանձին շրջաններում սպասվում են տեղումներ՝ լեռնային և առանձին նախալեռնային շրջաններում ձյան և ձնախառն անձրևի, հովտային շրջաններում՝ անձրևի տեսքով: Դեկտեմբերի 7-ի ցերեկը և 8-ի գիշերն առանձին հատվածներում տեղումները կլինեն առատ։ Դեկտեմբերի 11-ին սպասվում է առանց տեղումների եղանակ։ Դեկտեմբերի 8-12-ն Արարատյան և Շիրակի դաշտի ցածրադիր հատվածներում առավոտյան ժամերին սպասվում է մառախուղ։ Քամին՝ արևմտյան՝ 2-5մ/վ։ Օդի ջերմաստիճանը դեկտեմբերի 7-ի ցերեկը կնվազի 2-4, Լոռիում, Տավուշում, Սյունիքում՝ 5-7 աստիճանով, դեկտեմբերի 8-ի ցերեկը կբարձրանա 3-4 աստիճանով: Երևան քաղաքում՝ Դեկտեմբերի 7-ի ցերեկը, 8-ի գիշերը, 9-ի երեկոյան, 10-ին, 12-ին սպասվում է անձրև։ Դեկտեմբերի 8-ի ցերեկը, 9-ի գիշերը, 11-ին սպասվում է առանց տեղումների եղանակ։ ՇՄՆ «Հիդրոօդերևութաբանության և մոնիտորինգի կենտրոն» ՊՈԱԿ

Դեկտեմբերի 8-ին՝ ժամը 11:00-ից մինչև 12:00-ն ընկած ժամանակահատվածում,  Արարատի մարզի «Ջրաշեն բնակավայրի միջնակարգ դպրոց» ՊՈԱԿ-ում անցկացվելու է «Ազդարարում, տարհանում, պատսպարում» թեմայով գործնական պարապմունք, որի ընթացքում գործարկվելու է էլեկտրական շչակ։ Խնդրում ենք չանհանգստանալ։ 

Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են։ Կորեայի ձորի ճանապարհի հիմնանորոգման աշխատանքներով պայմանավորված, հաշվի առնելով քարաթափման վտանգը, օգոստոսի 19-ից ճանապարհը ժամանակավորապես փակ է երթևեկության համար։ Վարորդներին հորդորում ենք երթևեկել բացառապես ձմեռային անվադողերով։ Լարսի մասին Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

Դեկտեմբերի 6-ին, ժամը 13։09-ին Շիրակի մարզային ճգնաժամային կառավարման կենտրոն ահազանգ է ստացվել, որ «Հոռոմի խաչմերուկ» կոչվող հատվածում բեռնատար է կողաշրջվել. անհրաժեշտ է փրկարարների օգնությունը: Դեպքի վայր Է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ Երևան-Գյումրի ավտոճա­նապարհի 106-րդ կմ-ին` «Հոռոմի խաչմերուկ»-ի էստակադայի վրա, «Iveco» մակնիշի բեռնատարը կողաշրջվել է․ առկա է վառելիքի արտահոսք: Փրկարարները սահմանազատել են տարածքը, հոսանքազրկել ավտոմեքենան, հատուկ տեխնիկայի օգնությամբ ուղղել բեռնատարը և իրականաց­րել հերթապահություն՝ մինչ վառելիքի պարպումը:

Դեկտեմբերի 6-ին, ժամը 13։06-ին Կոտայքի մարզային ճգնաժամային կառավարման կենտրոն տեղեկություն է ստացվել, որ Երևան-Սևան ավտոճանապարհին՝ Լեռնանիստ գյուղի հատվածում, տեղի է ունեցել ՃՏՊ` բախվել է երկու ավտոմեքենա․ կան  տուժածներ։ Դեպքի վայր Է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ Երևան-Սևան ավտոճանապարհի 43-րդ կմ-ին բախվել են «Mercedes-Benz» և «Kia» մակնիշների ավտոմեքենաները: Մինչ փրկարարների կանչի վայր հասնելը՝ «Kia» մակնիշի ավտոմեքենայի ուղևորը հոսպիտալացվել է բժշկական կենտրոն։ Փրկարարները հոսանքազրկել են ավտոմեքենաները, փակել «Mercedes-Benz» մակնի­շի ավտոմեքենայի գազի բալոնի փականը, իրականացրել ճանապարհի լվացման աշխատանքներ և երեք ուղևորի մոտեցրել շտապօգնությանը․ տուժածները հոսպիտալացվել են բժշկական կենտրոն։

Հանրապետության տարածքում` Դեկտեմբերի 6-ի ցերեկը, 7-ի գիշերը, 9-ի ցերեկը սպասվում է առանց տեղումների եղանակ։ Դեկտեմբերի 7-ի ցերեկը, 8-ի գիշերը շրջանների զգալի մասում, 8-ի ցերեկը, 9-ի գիշերը, 10-11-ն առանձին շրջաններում սպասվում են տեղումներ՝ լեռնային և առանձին նախալեռնային շրջաններում ձյան և ձնախառն անձրևի, հովտային շրջաններում՝ անձրևի տեսքով: Դեկտեմբերի 7-ի ցերեկը և 8-ի գիշերն առանձին հատվածներում տեղումները կլինեն առատ։ Դեկտեմբերի 6-9-ը Արարատյան և Շիրակի դաշտի ցածրադիր հատվածներում առավոտյան ժամերին սպասվում է մառախուղ։ Քամին՝ արևմտյան՝ 2-5 մ/վ, դեկտեմբերի 6-ին առանձին շրջաններում սպասվում է քամու ուժգնացում՝ 13-16 մ/վ արագությամբ։ Օդի ջերմաստիճանը դեկտեմբերի 7-ի ցերեկը կնվազի 2-3, Լոռիում, Տավուշում, Սյունիքում՝ 5-7 աստիճանով, դեկտեմբերի 8-9-ի ցերեկն աստիճանաբար կբարձրանա 3-4 աստիճանով: Երևան քաղաքում` Դեկտեմբերի 6-ի ցերեկը, 7-ի գիշերը, 8-ի ցերեկը, 9-ին սպասվում է առանց տեղումների եղանակ։ Դեկտեմբերի 7-ի ցերեկը, 8-ին, 10-ի ցերեկը, 11-ի գիշերը սպասվում է անձրև։ ՇՄՆ «Հիդրոօդերևութաբանության և մոնիտորինգի կենտրոն» ՊՈԱԿ

ՆԳ նախարարության, Փրկարար ծառայության և Սեյսմիկ պաշտպանության տարածքային ծառայության նախաձեռնությամբ՝ դեկտեմբերի 5-ին Կոտայքի մարզում անցկացվել է «Դիմակայության բարձրացում՝ հանրային իրազեկման, պատրաստվածության և կարողությունների զարգացման միջոցով» թեմայով աշխատաժողով:   Նպատակը պետական կառավարման և տեղական ինքնակառավարման մարմինների համագործակցության խթանումն էր՝ ուղղված բնակչության պաշտպանության մեխանիզմների կատարելագործմանը, աղետների ռիսկի կառավարման պլանավորմանը, հանրային իրազեկվածության և ճգնաժամային հաղորդակցման ընթացակարգերի բարելավմանն ու դիմակայունության բարձրացմանը։ ՆԳ նախարարի մամուլի քարտուղար, ՆԳՆ հանրային հաղորդակցության և իրազեկման վարչության պետ Նարեկ Սարգսյանը կարևորել է ոչ միայն բնակչության պատրաստվածությունն ու հասարակության տեղեկացվածության բարձրացումը, այլև համայնքային մակարդակում կարողությունների կատարելագործումն ու թիրախային ուղղություններով համակարգված աշխատանքը։ Այդ համատեքստում նա ընդգծել է հանրապետության տարբեր մարզերում պարբերաբար անցկացվող հանրային իրազեկման միջոցառումներն ու ուսումնավարժանքները:  Փրկարար ծառայության տնօրենի տեղակալ Արսեն Մկրտչյանը նշել է, որ շահառու խմբերի համագործակցությունը կարևոր նախադրյալ է աղետների նկատմամբ ավելի դիմակայուն հասարակություն ձևավորելու գործում, ընդգծել նաև Փրկարար ծառայության ոլորտում կամավորական ներուժի զարգացումը։ Սեյսմիկ պաշտպանության տարածքային ծառայության Սեյսմիկ վտանգի գնահատման համալիր վարչության պետ Անի Գևորգյանն անդրադարձել է սեյսմիկ վտանգի առանձնահատկություններին, ներկայացրել վերջին տարիների ընթացքում Հայաստանի Հանրապետության սեյսմիկ վտանգի քարտեզները, ինչպես նաև այն աշխատանքները, որոնք ուղղված են համայնքների դիմակայունության ամրապնդմանը՝ ենթակառուցվածքների և բնակչության պաշտպանության նպատակով:  ՆԳՆ ՓԾ բնակչության պաշտպանության և աղետների ռիսկի նվազեցման վարչության պետ Գուրգեն Մարտիրոսյանը ներկայացրել է Հայաստանին սպառնացող հիմնական վտանգները՝ առանձնահատուկ ուշադրություն դարձնելով երկրաշարժի դեպքում հիմնական վարքականոններին։ ՆԳՆ ՓԾ բնակչության պաշտպանության և աղետների ռիսկի նվազեցման վարչության արտակարգ իրավիճակների պլանավորման բաժնի պետ Հովհաննես Հովհաննիսյանն անդրադարձել է համայնքային մակարդակում աղետների ռիսկի կառավարման համակարգի զարգացման, արտակարգ իրավիճակներին արձագանքման, քարտեզագրման, բնակչության պատրաստվածության բարձրացման անհրաժեշտությանը, ինչպես նաև առկա խնդիրներին ու դրանց լուծումներին։  Փրկարար ծառայության ճգնաժամային կառավարման ազգային կենտրոնի տեղեկատվության ապահովման և վիճակագրության բաժնի պետ Լիաննա Աբրահամյանը ներկայացրել է ՀՀ-ում իրականացվող հանրային իրազեկման և ճգնաժամային հաղորդակցության հիմնական մեխանիզմները՝ շեշտելով, որ պատրաստվածությունն ու իրազեկվածությունը հնարավորություն են տալիս նվազեցնել ճգնաժամային իրավիճակների ռիսկերը։  Աշխատաժողովի ընթացքում ծավալվել է ակտիվ քննարկում․ Սեյսմիկ պաշտպանության տարածքային ծառայության տնօրեն Սոս Մարգարյանը պատասխանել է մասնակիցների հարցերին։ Ամփոփելով աշխատաժողովի արդյունքները՝ Կոտայքի մարզպետի տեղակալ Հայկ Մկրտչյանը շնորհակալություն է հայտնել ՆԳ նախարարությանը նախաձեռնության համար՝ ընդգծելով, որ հատկապես երկրաշարժերին առնչվող թեմաներն արդիական են և կարևոր՝ հաշվի առնելով տարածաշրջանի սեյսմոակտիվությունն ու այդ համատեքստում հանրային անվտանգության մշակույթի ամրապնդումը։ Աշխատաժողովին մասնակցում էին ՆԳ նախարարության աշխատակիցներ ու փրկարար ծառայողներ, Կոտայքի մարզպետի աշխատակազմի ներկայացուցիչներ, մարզի համայնքների և բնակավայրերի վարչական ղեկավարներ, արտակարգ իրավիճակների գծով պատասխանատուներ։

Դեկտեմբերի 5-ին, ժամը 23։26-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Պռոշյան փողոցում տեղի է ունեցել ՃՏՊ․ անհրաժեշտ է փրկարարների օգնությունը։ Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից երկու մարտական հաշվարկ։ Պարզվել է, որ բախվել են «Hyundai», «Tesla», «Kia», «Opel», «BYD», «Nissan» և «Hyundai» մակնիշների ավտոմեքենաները․ ինչի հետևանքով «Kia» մակնիշի ավտոմեքենայի վարորդը տեղում մահացել է։ Մինչ փրկարարների կանչի վայր հասնելը՝ «Tesla» մակնիշի ավտոմեքենայի վարորդը տեղի ուժերով տեղափոխվել է բժշկական կենտրոն։ Փրկարարները փակել են «Kia» մակնիշի ավտոմեքենայի գազի բալոնը և հոսանքազրկել «Tesla» մակնիշի ավտոմեքենան։

Դեկտեմբերի 5-ին, ժամը 18։20-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Մյասնիկյան պողոտայում այրվում է ավտոմեքենա։ Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։ Հրդեհը մեկուսացվել է ժամը 18։36-ին, մարվել՝ 18։49-ին։ Այրվել է «Ford» մակնիշի ավտոմեքենայի սրահը և շարժիչի հատվածը։

Դեկտեմբերի 5-ին, ժամը 15։01-ին Ճգնաժամային կառավարման ազգային կենտրոն ահազանգ է ստացվել, որ Արմավիրի մարզի Մրգաշատ գյուղում այրվում է խոտի դեզ։ Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատներից երկու մարտական հաշվարկ։ Պարզվել է, որ հրդեհը բռնկվել է 6-րդ փողոցի 2-րդ նրբանցքի տներից մեկի բակում։ Հրդեհը մեկուսացվել է ժամը 15:29-ին, մարվել՝ 16:41-ին: Այրվել է մոտ 300 հակ անասնակեր։ Հրշեջ-փրկարարներին հաջողվել է կանխել հրդեհի տարածումը դեպի անասնագոմ։

ՆԳ նախարարի տեղակալ Արմեն Ղազարյանն ու ՓԾ տնօրեն-ՆԳ նախարարի տեղակալ Կամո Ցուցուլյանը դեկտեմբերի 4-ին հանդիպել են ԱՄՆ Եվրոպական հրամանատարության Ռազմական պլանավորման վարչության պետի անվտանգային ոլորտի համագործակցության, զանգվածային ոչնչացման զենքի տարածման, հակազդման, ՆԱՏO-ի հարցերով տեղակալ Քրիս ՄքՔինի գլխավորած պատվիրակությանը։ Բարձր գնահատելով ձևավորված սերտ համագործակցությունը` Արմեն Ղազարյանը այդ համատեքստում կարևորել է Փրկարար ծառայության անձնակազմի և տեխնիկական կարողությունների շարունակական զարգացման անհրաժեշտությունը ճառագայթային, քիմիական և կենսաբանական վտանգների արձագանքման ոլորտում։ Նա նշել է, որ համատեղ իրականացվող ծրագրերն ունեն դրական արձագանք, և կարևոր է, որ լինեն շարունակական՝ ի նպաստ համընդհանուր օրակարգի։ Արմեն Ղազարյանն ընդգծել է, որ հանրային անվտանգության ապահովման տեսանկյունից առանձնահատուկ կարևորություն ունեն պետական կառույցների փոխգործակցությունը, ռեսուրսների ճիշտ բաշխումն ու ժամանակակից տեխնիկական լուծումների կիրառումը։ ՓԾ տնօրեն-ՆԳ նախարարի տեղակալ Կամո Ցուցուլյանը, ներկայացնելով բարեփոխումների շրջանակում իրականացվող ծրագրերը՝ անդրադարձել է միջազգային գործընկերների հետ համագործակցության դինամիկային և հեռանկարային ուղղություններին։ Նա նշել է, որ արտակարգ իրավիճակներին առավել  արդյունավետ արձագանքելու նպատակով Փրկարար ծառայությունը շարունակաբար կատարելագործում է տեխնիկական բազան և մասնագիտական ներուժը՝ անցկացնելով ուսումնավարժանքներ, գործնական պարապմունքներ, ինչպես նաև այլ գերատեսչությունների հետ միջազգային չափորոշիչներին համապատասխան համալիր ուսումնավարժություններ։  Քրիս ՄքՔինն իր խոսքում նշել է, որ համագործակցության արդյունավետության վերլուծությունը և գնահատումը առաջնահերթությունները վերաարժևորելու հնարավորություն են: Նա քաղաքացիական անվտանգության ոլորտում համագործակցությունը նոր թափով վերսկսելու պատրաստակամություն է հայտնել:   Պատվիրակության անդամները Փրկարար ծառայությունում ծանոթացել են ճառագայթային, քիմիական և կենսաբանական վտանգների արձագանքման ոլորտում կիրառվող տեխնիկական միջոցներին։ Մասնավորապես՝ ցուցադրվել են վարակազերծման համար նախատեսված գույքը, հետախուզական սարքերը, շնչառական ապարատները, տրանսպորտային միջոցները և այլն: Կողմերը բնակչության անվտանգության մակարդակի բարձրացմանը և աղետների ռիսկի նվազեցմանը ուղղությամբ համատեղ ծրագրերը շարունակելու պատրաստակամություն են հայտնել: